KUTÎKÊ VERÊ ÇÊVERÊ CENEMEYÎ


Bu makale 2014-11-30 15:10:21 eklenmiş ve 3061 kez görüntülenmiştir.
Daimi Doğan

Hemîlka(Amerîka) ke 2003îne de hêrîşê Irak ser kerdîbî, ma zafê tenêwu serkewtîme ke êndî Rojvejê mîyanênî de reyna qalê haştîye nêbeno. Hêriş ser ra jêde waxt nêvêra ke Irak de tayê rêxistinî vecîyayî. 2004îne de wertê na zelemele de rêxistîna terorker ÎŞÎD kî(zî) pêyda bîye. Ewro dîna de her ca de azayê nînû(nînan) barbarenênî ra bîyê eskera. Qe guman çîn o ke ewro nê ke estê sevevê xo Hemîlka û kolonyalîstê bîn ê. Çi hêfo ke hezîranê 2014îne ra hata nika nînû zeraro pîl kerdo bara ezdaîwû(êzîdî) û kurdû.

Nê barbarî, tayê qeydewû ra, tayê rêxistinê cîhadkerê îslamî ra zovîna ca der ê. Çike nê serva duwela îslamî her çîwo xiravin virazenê. Çike nînû de nê sermayîş, nê îsonîye, nê kî exlax esto. Nê, vilê îsonû tekbîr ra birnenê, îsonû rê şîyazet(sitam) kenê, reyê kî cinawurêna xo oncenê, erzenê înternet.  Dîna belkîya nînû hona nas kena, hama ma alevîyî nînû, çerme kerdena Hallac-i Mansur û Nesîmî ra naskeme. Ma nê cîhadkerê gonewerû; Dersîm, Gumgum, Çorim û Sewaz ra naskeme. Ma nînû, sloganûnê ke namê îslamî ra ma rê eştê : “Gonî û cênîyê înû mislimanû rê helal o, “Gonîya ma ke berr bo zefer îyê îslam o”, “Roce û nemaz ra hacîyên nêbena”, “Kam ke jû alevî bikiso jê(sey) howt rey hac şîyayîş û bîyayîş beno wayîrê xêre” înû(înan) ra naskeme. Ma nînû pê kay kerdena cênîwû ra, qafika domanûnê ma pira kuyena koka dare ra, kiştena cênîwûnê ma yê diganîwû ra naskeme. Ma nê cinawurû Gumgum de tornavîda ra, çimê pîrîka ma Cennete kî vetîbî naskerdîbî. Pîrîka ma hem 80 serre de bîbî, hem kî çimeşêfil bîye. Yanê ma nînû serva cenet şîyayene, ma rê ceneme ronayene ra naskeme.

Tirkîya de îyê ke xo misliman sayê kenê, jêde xo zerê mislimanîya Anadoliye de vênenê. Eke nîya bo çîyê ro rind o, hama oncîya kî tayê xerepîyayî vejînê. Nê xerepîyayî hata gundê xo, qe(qet) cayê xo ra nêlewînê, hama cayê ra poşt ke vênite desinde erjîne ver. Ma nînû ra tayê; Dîlok, Semsûr, Erzingan û Îzmîr de çêyê(key) alevîwû nîşan kerdene de, dêsûnê çêyê alevîwû de milqî nustene de vênîtîme. Tewr(heta) nînû verde tayê nustoxe gostermeyî kî dîyayî. Îyê ke peyde rê, ê(î) her çî rê verênî ra amadeyê. Jû nîşan ci do, ci rê beso. Nîşan ke guret, kes xincê înû verde besenêkeno bivindo. Hen zaneme ke ewro kî tayê bêsor û bêbinatewû rê amadeyê.

 Ewro pêro alevî û kurdî zanene ke ÎŞÎD ke Rojava de zefer dî, dima rêze de Tirkîya esta. Çi hêfo ke tayê tirkî hona talukey ser nêkewtê. Çike jêde alevî namê xo verênî ra ÎŞÎD mebo kî fikrê nînû ra tayînewû ra nas kerdoxê! Qirrimê verênû hona vîr ra nêşîyo. Ewro kurdî kî Rojava da nê çiyê çi nîyê, rind kewtê ser. Alevîwû verênî ra hata nika jênosîdû ra xeylê çî musayê. Rind zaneme ke ê cinawurî ke amey Tirkîya, raver serva cîhadê xo alevîwû rê dismenên kenê.

Ewro her kes zaneno ke ÎŞÎD, Rojvejê mîyanênî de verê tayê duwelû ver de kutikên keno. Ezdaîwû rê û Kobanê de kurdû ser ça hêrîş kenê her kes zaneno. Tirkîya, guman çîn o ke adir ra kay kena. Çike ÎŞÎD, 2013 de Reyhanli de 53 welatizê Tirkîya kî kiştîbî. Yaverê Serverê ABD Joe BÎDEN bîla, nînû rê ardimê Tirkîya kerd eskera. Ewropa de her kes ardimê Tirkîya qesey keno. 1ê asma payîza wertîye de Îmc tv de her kes eve çimûnê xo ra her çî dî. Verê tankû ra azayê gonewerû çitur yenê-sonê her kes vênît. Serekkomarê Tirkiya vejîya vake: “Kobanê ewro ya kî meşte ginenowar.” Na qesû ra dima Tirkîya de her ca de kurdî, tayê dêymdarî û alevîyî vejîyayî sukû, vengê xo kerd berz. Hama na geyîm kî eve polîsû û leşkerû ra hêrişê qomû ser kerd. 7 asma payîza wertîye ra hata nika, protestewû de 46 teney îsonî ya kişîyayî ya kî dayî kiştene. Her çî hetera, na ra tepîya gundê bêtêkewtîş çitur dewan keno kes nêzaneno. Adana de vilakerdoxê Azadîya Welat û Rojnameya Gundemî, Kadrî Baxdu jê serrûnê 1990î kişîya.

Alevîwû, Şengal de ezdaîwû rê dismenêna barbarû, hestîrîwû ra vênit. Miletêjûbîyayî rê gorê; Şengal de 5000 ra jêde cuamerdî kişîyê û deva-deve 7000 hazarî ra jêde cuanîkî kewte ra barbarû desti. Alevîwû jênosîdê ezdaîwû ra hata nika Tirkîya de zaf cawû de ardimê kampanyayî  viraştî. Dersîm, Erzingan, Meletî, Semsur, Mersîn, Estamol, Îzmîr, Enqere u zobina cawû de ardim arêde kerd. Jêde alevîwû protestoyê Kobanê de kî cayê xo guret. Çike alevîyî xoverdayîşê Kobanê zaf rind zanit ke xoverdayîşê îsonîye wo. Çike pêro alevîyî ewro zanene ke Tirkîya de heqe guretîş, poştjûbîndayîş ra beno. Verênî ra hata na waxt alevîyî sarê kam ke kewto tengîye, leyê înû de cayê xo gureto. Hama alevîyî raver gereke wertê xo de jûbîndayiş bikerê. Çike kutîkê verê çêverê(keyber) cenemeyî, ewro verê çêverê ma der ê. Gereke hayîg bimanîme. Vatena Malcolm X ra: “Ameyox, îyê ke nika ra serva ey xo amade kenê, îyê înûn o.” 

Yorumlar
Adınız :
E-Mail :
Başlık :
Yorumunuz :
Güvenlik :
Değiştir  
Toplam 0 yorum. Tüm yorumları okumak için tıklayın.
Diğer yazıları...
Köşe Yazarları
 ‹ 
 › 
ÇOK OKUNANLAR
SON YORUMLANANLAR
Arşiv Arama
- -
Anket
Dersim Haber  Merkezi
© Copyright 2013 DM ISLEM. Tüm hakları saklıdır. Bu site DM ISLEM haber yazılımı alt yapısı ile yapılmıştır.